I 2011 held me fram med utstillingsrekka med barnebokillustratørar. Denne gongen er det boka ”Bukke, nikke, neie” som er valt ut. Boka er gitt ut i samband med at det er 150 år sidan Margrethe Munthe blei fødd. Til boka har Eli Hovdenak laga humoristiske tolkingar av Munthes tekstar. Her er både ”På låven sitter nissen" og Nei, nei gutt" og fleire kjente og mindre kjente songar og dikt representert.
Utstillinga er ei del av ”På terskelen til morgonhuset”, eit fleirårig litteraturprosjekt i Hå kommune med utspring i Leseåret 2010. Det er eit samarbeid mellom kulturinstitusjonane Hå folkebibliotek, Hå gamle prestegard og Hå kulturtorg.
Eli Hovdenak er utdanna ved Statens Håndverk og kunstindustriskole og Statens Kunstakademi. Ho har mellom anna stilt ut i Oslo Kunstforening og Norske Grafikere. Hovdenak har delteke på Høstutstillingen fleire gonger og er kjøpt inn av mellom andre Norsk Kulturråd og Nasjonalgalleriet.