Om oss

Hå gamle prestegard er ein kunst- og kulturinstitusjon etablert i 1983 i eit tradisjonsrikt og verna anlegg. Den tidlegare prestegarden (ca 1637 – 1919) er i dag arena for samtidskunst. Prestegarden er ein av dei mest besøkte utfartsstadene på Jæren, og er eit godt utgangspunkt for kortare og lengre turar langs Kongevegen og Nordsjøvegen. Hå gamle prestegard er ein møtestad mellom samtida og lokalhistoria. Anlegget, som ligg ved havet, består av ulike jærhus, som våningshus og andre driftsbygningar.Anlegget er ein del av Hå kommune sin kulturminneplan. Området rundt Hå gamle prestegard har ei rik historie som går 9000 år tilbake i tida.

Hos oss finn du:

•  Utstillingar:  Sjå samtidskunst og kulturhistorie
• Arrangement: Opplev familiedagar, føredrag, omvising og utstillingsopningar
• Kafé: Smak på god mat av lokale råvarar
• Kunstbutikk: Utforsk ein av dei største kunstbutikkane i Norge!
• Turmuligheter: Ta steget ut i kulturlandskapet. Prestegarden er eit godt utgangspunkt for kortare og lengre turar langs Kongevegen og Nordsjøvegen.
• Overnatting:  Tilbring natta i bustader som tidlegare var heimen til fyrvaktarane på Obrestad fyr.

Prestegardens historie

Den første prestegarden på Hå vart truleg bygd kring 1630 - då som privat prestegard og vert drive som prestegard fram til 1919.  

To brannar herja prestegarden - i 1725 og 1787. Dei noverande bygningane er frå tida etter siste brannen. Våningshuset, som i dag rommar kafe, vart reist i 1789 med påbygg kring 1850. Den austre driftsbygningen er dels frå slutten av 1700-talet, dels frå slutten av 1800-talet. I 1927 vart ”den nye løa” reist - den som ligg i vest. Driftsbygningane er i dag utstillingslokale.

Jærhuset som vart flytta til Hå i 1985 erstatta den gamle forpaktarbustaden som stod på same staden frå 1834 til midten av 1950-talet.

Prestegarden på Hå låg i heile denne perioden langs hovudferdselsåra mellom Stavanger og Sørlandet, og vidare til Danmark. Sjøvegen og den gamle Kongevegen gjorde staden sentral. I 1847 blei det første skulehuset i prestegjeldet satt opp her. Også politisk og sosialt var prestegarden sentral i bygda. I 1919 vart Hå fråflytta som prestegard, men blei drive som eit lokalt gardsbruk frå 1930-talet.

I 1977 kjøpte Hå kommune garden som blei opna for publikum i 1983. Dette har tilført området nye funksjonar og nytt liv.

Strandgravfeltet

Langs kysten på Jæren finn ein kring 800 gravrøyser. Hå-gravfeltet ligg på rullesteinstranda ved prestegarden. Dette er eit av dei finaste gravfelta i Norden frå ca. 300 til 700 e.Kr. Gravrøysene har ulik form og storleik. Det er funne både glasperler, spinnhjul og våpen. Desse er no på Arkeologisk Museum i Stavanger.

Funn frå Steinalderen

I tunet på prestegarden er det funne spor frå ein 9000 år gammal busetnad. Funna frå dette området dannar grunnlaget for utstillingen SPOR som de finn i kjellaren på Jærhuset. Her kan de lære meir om menneska og naturen på Hå i steinalderen. Les meir om utstillinga her: SPOR - permanent utstilling om forhistoria på Hå. 

Fyrmuseum og skiftande utstillingar. Sjølve fyret står slik det var i 1991, når fyret blei automatisert og fråflytta. Inne på Obrestad fyr finn du informasjon om historia til Obrestad fyr og livet langs kysten. Museet fortel om fyrdrift, kvardagen til fyrvaktarane og korleis fyret har vore ein viktig del av navigasjonen langs Jærkysten gjennom generasjonar. Sjølve fyrlykta i fyrtårnet er ei fransk Fresnel- linse frå 1873, med firkanta, roterande linseelement. 

I 2006 kjøpte Hå kommune fyret av Kystverket. Eit mål med kjøpet er å bevare kulturen og historia til anlegget, og vise korleis fyr kan nyttast i nye samanhengar.  Sjølve fyrbygningen er i dag fyrmuseum og står slik det var i 1991. Obrestad fyr er eit fastlandsfyr og er ein del av Hå kommune sin kulturminnevernplan.

Fyrmuseet er kun ope i sommersesongen 6. juni - 6. september.

Natur og kultur 

Anlegget oppe ved fyret er freda og området sørover mot Obrestad hamn er verna. Området langs kysten har òg eit rikt fugleliv. Det er derfor forbode å fly drone i området i både sørgåande og nordgåande retning.      

Då fyret på Obrestad var i drift budde fyrvaktarane og familiane deira i husa oppe ved fyret. Husa er i dag brukt til utleige. Tre bueiningar kan leigast til overnatting og ein bustad kan leigast til seminar og selskap.  Alle husa har unik utsikt, anten mot havet eller mot Høg-Jæren og vindmøllene. Fyret og bustadane har originale fasadar slik dei var i 1991 då dei blei flytta frå. Boligane er modernisert og nøkternt innreia med smakfulle og funksjonelle møbler.
Sjå overnatting for oversikt over bueiningane med prisar. 

Fyrmuseet og bustadane er drifta av Hå gamle prestegard.

Kunstutstilling

Sommeren 2026 rommar Fyrmuseet ein installasjon av Carlos Amorales. I utstillinga Black Cloud / Svart sky fyller den meksikanske kunstnaren Carlos Amorales Obrestad fyr med tusenvis av handlaga, svarte papirsommarfuglar. Installasjonen tek utgangspunkt i det internasjonalt kjende prosjektet Black Cloud, som sidan 2007 har vore vist ved kunstinstitusjonar verda over, men aldri tidlegare i Noreg. Verket undersøker tema som migrasjon, tap, forvandling og kollektiv rørsle, inspirert mellom anna av monarksommarfuglen si årlege vandring. Gjennom fyrtårnet sine rom, trapper og lys skaper installasjonen ei omsluttande oppleving der publikum blir inviterte til å reflektere over orientering, tilhøyrsle og rørsle i ei verd prega av endring.