Tobias Sternberg arbeider med krysninga mellom born sin leik med leiketøysoldatar, vaksne menn som bygger kompliserte modeller relatert til krig og tenåringar som blir sett inn i reelle krigssoner etter berre få månadar med trening og med eit nytt våpen i handa. Ved å sjå på ulike haldningar til krig kan me kanskje finne kva haldingar samfunnet har til krig og kvifor me har desse haldningane. I tillegg til temaet krigsleiker undersøkjer Sternberg oppofringsmytologien frå eit kristenst perspektiv gjennom si kunstverksemd.
I utstillinga på Hå gamle prestegard får me sjå installasjonar og skulpturar knyta til temaet krig. Sternberg arbeider ofte med å lage situasjonar og tablå. Arbeida i utstillinga er ei blanding av frittståande skulpturar og installasjonar som flyter over i rommet dei blir synt i.
Tobias Sternberg (fødd 1973) vaks opp i Sverige. Han studerte kunst ved Goldsmith's College i London og har i tillegg studert filosofi, historie og kreativ skriving. Sternberg er representert ved Krupic und Kersting Gallery i Cologne, Tyskland og bur og arbeider no i Berlin.