Hå gamle prestegard har følgt Karen Klim i mange år og er no glade for endeleg å få ei separatutstilling med kunstnaren.
Karen Klim har sidan 1978 arbeida med varmt glas frå atelieret sitt på Frysja i Oslo. Ho seier at «vann, is og den fastfrosne natur» er element som inspirerer henne. Vidare påpeiker ho at «glasset er et spontant, mykt og føyelig materiale - når det er varmt. For meg er det viktig å beholde noen av de kvaliteter i det ferdige verk. Etter arbeidet er nedkjølt, benytter jeg meg i noen tilfeller av sandblåsning og sliping.»
Eit kjenneteikn med arbeida til Klim er at ho med det varme, flytande glaset, klarer å fange og halde fast sanseligheten og karakteren i forma. Ein kan ofte sjå at den ferdige forma ein gong har vore flytande masse.
I utstillinga på Hå gamle prestegard vil ho syne vasar, stilleben og objekt, alle i fritt forma glas.
Karen Klim (f. 1951) er fødd i København og bur og arbeider no i Oslo. Ho er utdanna ved Kunsthåndverkerskolen i København. Klim har delteke på ei rekkje gruppeutstillingar og hatt fleire separatutstillingar. Ho er kjøpt inn av mellom anna alle Kunstindustrimusea i Norge, Kunstindustrimuseet i København, Victoria and Albert Museum i London og Norsk Kulturråd.
Karen Klim, Lyden av frost, 2012
Espen Grøndal