Skulptur / Installasjon
Installasjonen POST markerar avslutninga av prosjektet PELS (2020–2025), som er aktuelt i samband med den komande lova som forbyr hald av pelsdyr i Noreg frå 2025. Prosjektet reflekterar over denne historiske overgangen og gir ei kunstnarleg skildring av pelsdyrnæringas betydning i norsk kulturhistorie.
Utgangspunktet for prosjektet er ei omfattande samling av pelsmateriale frå den nedlagde familieverksemda Olaf Pettersen & Co, ein skreddar og pelsmakar i Stavanger. Desse materiala fungerar som berebjelkar for historiar og minne frå ei næring som no er i ferd med å forsvinne frå den norske kulturarva. Gjennom kunsten søkjer Kommedal å gi materialet ein symbolsk gest av takksemd, samstundes som ho utforskar den djupgåande historiske og kulturelle betydninga.
Kommedal ser det som ein viktig del av kunstens rolle i samfunnet å utfordre etablerte idear, opne for nye perspektiv og reflektere over vår felles historie. På same måte som draumar styrkar individets helse, kan kunsten bidra til samfunnet si sjølvforståing.
POST undersøkjer pelsdyrnæringas 100 år lange historie og dei arkitektoniske og kulturelle spora ho har sett etter seg. Pelsdyrhus, som tidlegare var ein sentral del av kulturlandskapa i norske bygder, er no borte. Desse strukturane representerte eit konkret samband mellom mennesket, naturen og næringa.
Materiala i prosjektet – skinnstykkja – ber synlege teikn på si fortid. Handskrivne markeringar og eigarsignaturar vitnar om eit nært forhold mellom mennesket og materialet. Kulepennmarkeringane framhevar den emosjonelle og personlege tilknytinga til materiala, samstundes som dei peikar på mennesket sine avtrykk i naturen.
Gjennom PELS utforskar Kommedal tema som antroposentrisme, sjamanisme og animisme, med fokus på forhalda mellom mennesket og dyr. Ved hjelp av tradisjonell draumetyding undersøkjer Kommedal ein estetikk som bryt med det rasjonelle og gir rom for refleksjonar over vår eigen tilknyting til natur, materialitet og fortidas ideal.
POST er slik ei siste skildring av norsk pelsdyrhistorie og ei kunstnarleg refleksjon over ei næring i endring – eit rom for nye perspektiv på menneskets forhald til dyr, natur og det umedvetne.
Tove Kommedal (f. 1970) debuterte på Vestlandsutstillinga i 2004. Ho har lenge arbeidd med underliggjande konsept og tematikk i ei utstillingsretta praksis – som tek form gjennom ulike metodar og fleire teknikkar som installasjon, teikning, silketrykk, collage, tekst og film. Kommedal har deltatt på fleire separatutstillingar og gruppeutstillingar nasjonalt og internasjonalt.
Høgdepunkt inkluderer separatutstillingar som Oksymoron ved Østfold kunstsenter i 2022 og Definisjonsmakt, vist på Oppland kunstnersenter, Lillehammer i 2017 og Hå gamle prestegard i 2015. Av gruppeutstillingar kan nemnast: Høstutstillinga 2024, FARGE på Arkivet, Tou Trykk, Stavanger 2023, Konstruksjonar, KinoKino Kunstsal, Sandnes 2022/23 og Fra balkongen, Stavanger kunstmuseum 2020.
Kommedal har motteke fleire stipend, inkludert Rogaland fylkeskommune sitt kulturstipend 2024, Stavanger kommune sitt arbeidsstipend 2023 og støtte frå Billedkunstnernes Vederlagsfond (2006–2023).
Kommedal er invitert til kunstnarlege intervensjonar i offentleg rom og institusjonar som BALLAST, Find Your Eyes #4 (kurator Monika Wuhrer, USA), Kulturøya Sølyst, Stavanger i 2018, og Echo (2014), samt utstillinga Hvem eier historien ved Stavanger kunstmuseum i 2014.
Kommedal har fått internasjonal anerkjenning med kunstfilmar vist på Nordisk Salong (2019), Charlottenborg (2018) og Taiwan International Video Art Exhibition (2015).
Utstillinga er støtta av Norsk kulturråd, Regionale prosjektmidlar (KIN), Statens utstillingsstipend, Norske Billedkunstneres Vederlagsfond, Stavanger kommune og Rogaland fylkeskommune. Kunstnaren sine filmprosjekt er støtta av Filmkraft AS og Fond for lyd og bilde.