I lag med samarbeidspartnarar inviterer Hå gamle prestegard til Kvifor bry seg om - føremiddagsarrangement i kaféen. Føremiddagsarrangementa skal ha kjekt og informativt innhald, vera lokalt forankra, relevante for årstida, eller på andre måtar aktuelle for samfunnet her og no.
Lær meir om arkeologiske utgravingar med Kristin Armstrong Oma. Arrangementet er i samarbeid med Arkeologisk museum i Stavanger.
Utgangspunktet for februar-arrangementet er tela som slepp taket i jorda. Etter vinteren har jorda ein tendens til å spytta steinar og gjenstandar opp mot overflata, og februar er derfor ofte månaden kor mange børstar støv av metalldetektoren.
Å søka med metalldetektor er for nokon ein spanande hobby, og aktiviteten har også bidratt til arkeologiske funn, som igjen har bidratt til forsking, formidling og forvaltning. Som privatperson kan ein bruka metallsøkar i Norge, men grunneigarar må informerast, og den enkelte pliktar å setta seg inn i lovar og reglar for framgangsmåte og bruk.
Men korleis kan ein vite om ein har gjort eit viktig funn? Om det er ein viktig flik av fortida ein har funne, eller berre noko skrot frå i fjor?
Kristin Armstrong Oma har grave mykje i jorda. Ho har funne både skrot, skrap og gull, og på dette arrangementet vil ho løfta fram nokon av desse funna. Oma vil i hovudsak fokusera på nye praktfunn som har kome fram gjennom både metallsøking og utgravingar, slik som gullbrakteatane frå Rennesøy, utgravingane i Domkyrkja, og sølvringane i Årdal. Men ho vil og belyse nokre av funna frå jernaldergravfeltet på Hå gamle prestegard, i tillegg til å koma med nokon praktiske vink og råd viss du sjølve lurer på om du skal skaffa deg ein metalldetektor, eller viss du allereie har ein, og lurer på korleis du skal gå fram.
Kristin Armstrong Oma er professor i arkeologi, og blei nyleg tilsett som museumsdirektør ved Arkeologisk museum på universitetet i Stavanger. Ho har kuratert arkeologiske utstillingar og skrive utallige bøker og fagartiklar. Arrangementet er i samarbeid med arkeologisk museum ved Universitetet i Stavanger.
Velkommen til føremiddagsarrangement i kaféen på Hå gamle prestegard.
Det vil bli servering av kaffi/te og heimelaga lefser.
Pris: 150 kr (billett inkluderer inngang i kunstutstillingane, og i den arkeologiske utstillinga SPOR)
Påmelding: post.hgp@ha.kommune.no merk epost med “Kvifor bry seg om / å grava i jorda etter fortida 20. februar 2025”
Link til arkeologisk museum i Stavanger:
Arkeologisk museum | Universitetet i Stavanger
Bilete 1: Kristin Armstrong Oma og kollega under arkeologiske utgravingar / Røysland, Nordre Tjemsland, Hå / Arkeologisk museum i Stavanger
Bilete 2: Kristin Armstrong Oma / Arkeologisk museum i Stavanger